Apple​ ​បញ្ឈប់​វិស្វករ​ម្នាក់​ ​ក្រោយ​ឲ្យ​កូន​ស្រី​ថត​វីដេអូ​កាន់​ ​iPhone X​ ​មុន​ចេញ​លក់

កាល​ពី​សប្ដាហ៍​មុន​ ​យុវតី​ម្នាក់​ឈ្មោះ​ ​Brooke Amelia Peterson​ ​បាន​ធ្វើ​ឲ្យ​បណ្ដាញ​សង្គម​វីដេអូ​ ​YouTube​ ​ក៏​ដូច​ជា​បណ្ដា​សារព័ត៌មាន​ជុំវិញ​ពិភពលោក​ភ្ញាក់ផ្អើល​ ​ជា​មួយ​នឹង​វីដេអូ​កាន់​ប្រើប្រាស់​ ​iPhone X​ ​ដែល​មិន​ទាន់​មាន​លក់​លើ​ទីផ្សារ។ប៉ុន្តែ​វីដេអូ​នោះ​ ​បាន​ធ្វើ​ឲ្យ​ ​Apple​ ​សម្រេច​បញ្ឈប់​ការងារ​ឪពុក​របស់​យុវតី​ខាង​លើ​ ​ខណៈ​គាត់​ជា​វិស្វករ​ក្នុង​សង្វាក់​ផលិតកម្ម​ផលិត​ ​iPhone X​ ​នឹង​ជា​អ្នក​ដែល​អនុញ្ញាត​ឲ្យ​ ​Brooke Amelia Peterson​ ​ថត​វីដេអូ​នោះ។

ចំពោះ​ការ​បញ្ឈប់​ពី​ការងារ​ឪពុក​របស់​ ​Brooke Amelia Peterson​ ​គឺ​ព្រោះ​តែ​ទង្វើ​របស់​វិស្វករ​នេះ​បាន​បំពាន​ច្រើន​ករណី​ ​ដូច​ជា​អនុញ្ញាត​ឲ្យ​កូន​ស្រី​ថត​វីដេអូ​ក្នុង​ការិយាល័យ​កណ្ដាល​របស់​ ​Apple​ ​ដែល​ជា​តំបន់​ហាមឃាត់​ ​និង​ថត​វីដេអូ​កាន់​ប្រើប្រាស់​មុខងារ​សំខាន់​ៗ​មួយ​ចំនួន​របស់​ ​iPhone X។

ទាក់ទង​នឹង​វីដេអូ​របស់​យុវតី​ខាង​លើ​ ​Apple​ ​ក៏​បាន​ស្នើ​សុំ​ឲ្យ​លុប​ចោល​ ​ខណៈ​ ​Brooke Amelia Peterson​ ​សម្រេច​ធ្វើ​តាម។ ប៉ុន្តែ​ទោះ​ជា​យ៉ាង​ណា​ ​វីដេអូ​នោះ​ត្រូវ​គេ​យក​ទៅ​បង្ហោះ​តាម​គណនី​បណ្ដាញ​សង្គម​ ​YouTube​ ​ជា​ច្រើន​បាត់​ទៅ​ហើយ៕