គ្រាន់តែឮពាក្យថារៀបការ អ្នកណាមិនរំភើប អ្នកណាមិនចង់បានល្អ ប៉ុន្តែគ្រប់យ៉ាងមិនមែនសុទ្ធតែបានល្អដូចចិត្តគ្រប់គ្នានោះឡើយ។ សម្រាប់អ្នកមានលុយ មួយជាតិរៀបការម្តង គេមិនខ្លាចនឹងចំណាយ ដើម្បីឲ្យពិធីមង្គលរបស់គេ កាន់តែមានន័យ និងក្លាយជាការចងចាំដ៏ល្អមួយនោះទេ។
សម្រាប់អ្នកល្មមៗ ឬខ្វះខាតវិញ ពួកគេទាមទារយ៉ាងណា ឲ្យពិធីការទាំងមូលបានទាំងល្អ ហើយចំណាយលុយតិច។ សម័យនេះ ពួកគេតែរៀបចំពិធីការកាត់ៗ ទៅតាមលទ្ធភាព។ ចឹងថ្ងៃនេះ Sabay នឹងណែនាំតិចនិកខ្លះៗ ដែលចំណាយអស់តិចក្នុងពិធីមង្គលការ៖
១. ចុងភៅ និងម្ហូប
ពិតជាសំខាន់ អ្នកអាចរិះថាំលើសេវាកម្មផ្សេងៗបាន តែម្ហូប ដាច់ខាតគួររៀបចំឲ្យបានសមរម្យជាទីបំផុត បើមិនអ៊ីចឹង ភ្ញៀវ និងមាត់ចាបមាត់ព្រាប ដឹងតែនិយាយដើមពេញភូមិហើយ។ លោក សីហា ដែលទើបនឹងរៀបការថ្មោងថ្មី ប្រាប់ថា៖ "វាស៊ីសងទៅលើលុយដែលយើងមាន និងប្រភេទភ្ញៀវដែលមកចូលរួម។ ម្ហូបមានថោក សមរម្យ ថ្លៃ បើសិនចង់ចំណាយតិច ចឹងតម្លៃសមរម្យគឺជាជម្រើសល្អបំផុត ឬអាចធ្វើការចរចាជាមួយចុងភៅ ដោះដូរម្ហូបដែលអ្នកគិតថានឹងជួយកាត់បន្ថយចំណាយ"។
២. ភេសជ្ជៈ
រកអ្នកទុកចិត្តឲ្យជួយមើលការខុសត្រូវឃ្លាំងភេសជ្ជៈ។ មុនចេញចូល ត្រូវកត់ឲ្យបានត្រឹមត្រូវ ទើបមិនសូវបាត់ និងខាត។ អ្វីដែលសំខាន់មួយទៀត ថាតើអ្នកគួរដាក់ស្រាផង និងស្រាបៀរផងជាមួយគ្នាដែរអត់? សាកគិតមើលថា បើសិនជាស្រាមួយដបតម្លៃ ២០ដុល្លារ ហើយ ស្រាបៀរមួយកេសតម្លៃមធ្យម ១៥ ដុល្លារដូចគ្នា បើអ្នកដាក់ទាំងពីរនោះតម្លៃកាន់តែកើនទ្វេ ប៉ុន្តែបើអ្នកគិតថាស្រាមិនសំខាន់ អ្នកអាចជ្រើសតែស្រាបៀរ ជាមួយទឹកក្រូច ឬទឹកផ្លែឈើក៏បាន ព្រោះវាជាចំណែកជួយសន្សំបានមួយកម្រិត។
៣. Pre-Wedding
មួយជីវិតការម្តង គួរតែមានរូបថត Pre-Wedding ទុកជាអនុស្សាវរីយ៍ពេលចាស់ តែក៏មិនចាំបាច់ឆ្លងខេត្តឬទៅថតនៅក្រៅប្រទេសនោះទេ បើសិនជាអ្នកចង់ចំណាយតិច។ ជម្រើសមិនមែនថាគ្មាននោះទេ ជួនកាលអាចបានស្អាតជាងផងក៏ថាបាន អ្នកអាចជ្រើសរើសការថតនៅក្នុង Studio ឬនៅជិតៗ កន្លែងដែលអ្នករស់នៅ។ ៖"យើងមិនមែនចេះតែចំណាយនោះទេ ទោះបីជាយើងចង់ក៏ដោយ តែយើងគួរគិតពីតម្លៃបណ្ណាការដែលខាងប្រុសបានផ្ដល់ឲ្យ។ យើងគួររៀបចំយ៉ាងណាឲ្យបានសមរម្យទៅតាមនោះដែរ។" នេះបើតាមឲ្យដឹងពីអ្នកនាង កន្និកា ទើបរៀបការកាលពីសប្តាហ៍មុន។
៤. ហាង
រៀបចំពិធីនៅហាង វាងាយស្រួលដល់ការចូលរួមរបស់ភ្ញៀវ តែអ្នកត្រូវគិតលើចំណុចមួយថា អ្នកមានលុយសម្រាប់ត្រៀមខាតហើយឬនៅ? ជម្រើសល្អបើអ្នកមានផ្ទះដែលអាចរៀបចំបាន គួរតែរៀបចំនៅផ្ទះព្រោះវាអាចសន្សំហោចណាស់ក៏ខ្ទង់ពាន់ដុល្លារបានដែរ។ តែអ្នកត្រូវច្បាស់ថា បរិវេណផ្ទះអាចរៀបចំបានស្អាតទេ ទីតាំងចតយានជំនិះ ធំទូលាយទេ?។ ជម្រើសមួយទៀតបើសិនជាផ្ទះខាងប្រុសអំណោយផល អ្នកអាចតែពិភាក្សាគ្នា គួរតែរៀបចំពិធីខាងប្រុស ឬអត់។
៥. សម្អាងការ
សព្វថ្ងៃតម្លៃសម្អាងការមានច្រើន អាចឲ្យងាយស្រួលជ្រើសរើស ប៉ុន្តែតម្លៃនិងគុណភាពក៏ទៅតាមនោះដែរ។ រើសមធ្យម រើសមួយណាដែលចាំបាច់ មិនចាំបាច់ថ្មីពេក កម្រិតកណ្តាល កាត់កងគ្នាបាន។ ជាក់ស្តែងបើអ្នកបានទៅស៊ើបសួរតម្លៃនៅតាមខេត្តជិតនឹងតំបន់ដែលអ្នករស់នៅ វាអាចប្រសើរ និងជួយកាត់បន្ថយបានមួយចំណែក ព្រោះតម្លៃតាមខេត្តធូរថ្លៃជាងនៅទីក្រុង។ ពាក់ព័ន្ធនឹងសម្អាងការអ្នកគួរតែជជែកឲ្យបានច្បាស់ថា ផ្នែកអ្វីខ្លះដែលអ្នកអាចកាត់ចេញបានបើសិនមិនចាំបាច់។
៦. ផ្លែឈើ
គួររៀបចំឲ្យហើយ ថាក្នុងនោះមាន ផ្លែឈើប៉ុន្មានគូសម្រាប់សែន ហែជំនូន សែនដូនតាជាដើម។ អ្នកត្រូវច្បាស់ថាគួរទិញហាងធំៗ ឬកន្លែងបោះដុំក្នុងតម្លៃធូរថ្លៃ? មួយទៀតអ្នកគួរជ្រើសរើសសេវារៀបចំផ្លែឈើហែជំនូន ឬគួររៀបខ្លួនឯង? បើសិនមិនចង់ចំណាយខ្ជះខ្ជាយ ការរៀបខ្លួនឯងជាជម្រើសល្អបំផុត ម្យ៉ាងក៏អាចជួបជុះបងប្អូនបង្កើនភាពស្និទ្ធស្នាលថែមមួយកម្រិត។
៧. ធៀបការ
បើសិនជាអ្នកជ្រើសរើសយកម៉ូដពិសេសៗ វាច្បាស់ណាស់ថាតម្លៃនឹងថ្លៃទៅតាមនោះដែរ។ ដូច្នេះមុនអ្នកគួរដើរស៊ើបសួរតម្លៃឲ្យបានច្រើនហាង ដើម្បីមើលប្រភេទម៉ូដ និងតម្លៃដែលអ្នកគិតថាមួយណាង្នកអាចយកបាន។ ប៉ុន្តែបើអ្នកគិតថាធៀបការវាគ្រាន់តែជាផ្នែកមួយសាមញ្ញ អ្នកអាចរើសយកម៉ូដធម្មតាៗ សមរម្យ ល្មមៗបានហើយ។
៨. រូបថត
បើសិនជាអ្នកយកតាមរយៈសម្អាងការ គេមានកំណត់តម្លៃ និងចំនួនរូបថតដែលពេលខ្លះវាច្រើនលើសលប់ និងចំណាយខ្ជះខ្ជាយ។ បើតាមបងប្រុសម្នាក់ អ្នកមានមានបទពិសោធន៍រៀបការកាលពីឆ្នាំមុនបានឲ្យដឹងថា៖ ជាទូទៅបើយកតាមភ្នួងគេយកតម្លៃថ្លៃ ព្រោះគិតចំនួនបុស្ត៍ បើយកអ្នកក្រៅដែលយើងស្គាល់ អាចបានតម្លៃធូរថ្លៃ ហើយយើងអាចធ្វើការចរចាជាមួយអ្នកថតថា ចំនួនរូប និង ចំណុចសំខាន់កន្លែងណាដែលយើងចង់បាន ចំណុចនេះកាលខ្ញុំការអាចចំណេញបាន ហោចណាស់ក៏ជិត៣០០ដុល្លារដែរ។
៩. អាំងប៉ាវ
ក៏មិនក្រោមខ្ទង់រយដុល្លារដែរ ព្រោះមានមនុស្សជាច្រើនដែលត្រូវឲ្យ តួយ៉ាងដូចជា អ្នកភ្លេង អ្នកកាត់សក់ លោកតាអាចារ្យ អ្នកកំដរ ជាដើម។ ចឹងចៀសវាងដល់ពេលប្រថុចញ៉ុច មានការពិបាក អ្នកគួរតែរៀបចំទុកមុនឲ្យបានច្រើន និងកំណត់តម្លៃនៅក្នុងអាំងប៉ាវឲ្យរួចរាល់ ទើបមិនមានភាពរញ៉េរញ៉ៃអំឡុងពេលការ។
១០. តែងផ្កា
ផ្កាក៏ចាំបាច់ ព្រោះវាជួយលើកសោភណភាព ពិធីការឲ្យកាន់តែស្រស់ស្អាតមួយកម្រិត។ តែអ្នកគិតថាគួរចំណាយលើវាច្រើនឬអត់? ករណីបើប្រើម្តងចោល ចឹងការរៀបចំកន្លែងខ្លះសម្រាប់ថតគួរតែជ្រើសរើស ផ្កាក្រដាសជ័រ បើខ្វះខាតខ្លាំងគួរចំណាយឬអត់តៅតាមចំណូលចិត្តអ្នក។ បើអាចអ្នកគួរពិភាក្សាជាមួយអ្នករៀបចំ គួរថាធ្វើបែបណាស្អាត ហើយចំណាយតិចតួច ជាពិសេសប្រើប្រភេទផ្កាក្រដាស ជ័រ ឬផ្កាស្រស់។
ទាំងអស់ខាងលើគ្រាន់តែជាគំនិតខ្លះ ដើម្បីចែកជូនប្រិយមិត្តដែលជិតមានពិធីមង្គលការ ធ្វើយ៉ាងណាឲ្យចំណាយអស់តិច ទៅតាមលទ្ធភាពនៃថវិកាពួកគេ។ យ៉ាងណាក៏ដោយ ទាំងអស់គឺជាការសម្រេចចិត្តរបស់អ្នកថាតើចង់បានធំដុំ ឬធម្មតា ហើយជាការចងចាំដ៏មានន័យសម្រាប់ក្រុមគ្រួសារទាំងសង្ខាង៕
ប្រភព៖ Sabay
Hello, my name is Jack Sparrow. I'm a 50 year old self-employed Pirate from the Caribbean.
No comments:
Post a Comment